الماتىدا ەل استاناسىنىڭ 20 جىلدىعىنا وراي ەلوردامىزدىڭ دامۋىنا ەلەۋلى ۇلەس قوسقان بىرقاتار ازاماتتار «استانا – ارداعىم» سىيلىعىمەن ماراپاتتالدى.
رەسپۋبليكا سارايىنا جينالعان زيالى قاۋىم وكىلدەرى مەن شاھار جۇرتشىلىعى استانامىزدىڭ اسقاقتاۋى جولىندا ايبىندى ەڭبەك ەتكەن تۇلعالارعا ايرىقشا ءىلتيپات كورسەتتى.
وسىدان تۋرا جيىرما جىل بۇرىن ءدال وسى جەلتوقسان ايىندا ەلباسى نۇرسۇلتان نازارباەۆتىڭ جارلىعىمەن تاۋەلسىز ەلىمىزدىڭ جاڭا استاناسىن ارقا تورىندەگى اقمولاعا كوشىرۋگە شەشىم قابىلدانعان بولاتىن. اراعا از ۋاقىت سالىپ جاڭا ەلوردانىڭ اتاۋى استانا بولىپ وزگەرتىلدى. بۇل يدەيا ءتاي-ءتاي باسقان جاس مەملەكەت ءۇشىن ەڭ ءبىر كۇردەلى كەزەڭ توقسانىنشى جىلدارى تۋىنداعان تاۋەكەلدى قادام بولعانىمەن, بۇل شەشىمنىڭ ومىرشەڭدىگىن ۋاقىت دالەلدەدى. بۇگىندە ءسان-سالتاناتى جاراسقان ايبىندى استانا تاۋەلسىزدىكتىڭ ءتول پەرزەنتىنە, بۇكىل قازاق ەلىنىڭ ماقتانىشىنا اينالدى. جاس استانانىڭ جان-جاقتى دامىعان جاسامپاز قالاعا اينالۋىنا جارقىن قادام جاساعانداردىڭ ىشىندە التىن ءتاجىن الاتاۋدان ارقا تورىنە اقجولتايلاپ اتتاندىرعان الماتىلىقتاردىڭ ەرەن ەڭبەگى مەن ارمان تىلەگى جاتىر. بۇل جونىندە شاھار باسشىسى بۇگىنگى ماراپاتتاۋ راسىمىندە كەڭىنەن ايتتى.
– الماتىلىق – عىلىم, ءبىلىم, ونەر, سپورت قايراتكەرلەرى, ارينە, مەملەكەتتىك قىزمەتكەرلەر العاشقىلاردىڭ ءبىرى بولىپ استانانىڭ ىرگەسىن قالادى جانە بارشا قازاقستاندىقتارمەن بىرگە جاس استانانىڭ قالىپتاسۋىنا زور ۇلەس قوستى. ءبىز سول ءۇشىن ۇنەمى ماقتانامىز! استانانى كوشىرۋ ەۋرازيا جۇرەگىندە جاڭا ءارى زاماناۋي قالانىڭ پايدا بولۋىنا ىقپال ەتتى, الماتىعا جاڭا ومىرلىك لەپ اكەلدى. بۇگىنگى كۇنى استانا - قالىپتاسقان ساياسي ورتالىق, جاڭعىرۋ سيمۆولى جانە وزگە وڭىرلەرگە ۇلگى. ەلباسىنىڭ اسا زور حالىقارالىق بەدەلىنىڭ ارقاسىندا مۇندا ەقىۇ-نىڭ, يسلام ىنتىماقتاستىعى ۇيىمدارىنىڭ سامميتتەرى, ازيادا ءوزارا ىنتىماقتاستىق جانە سەنىم شارالارى بويىنشا كەڭەس, الەمدىك جانە ءداستۇرلى ءدىن باسشىلارىنىڭ سەزدەرى ءوتتى. استانادا حالىقارالىق ەكسپو- 2017 كورمەسىنىڭ ءوتۋى ەلەۋلى الەمدىك وقيعا بولدى. عاسىرلار تۇيىسكەندە قازاقستان استاناسىن كوشىرگەن ءارى قالانى «قولدان جاساعان» العاشقى مەملەكەتكە اينالدى. پرەزيدەنت ايتقانداي, «وتە اۋىر 1990-شى جىلدارى استانا ءبىزدى قاناتتاندىردى, ءۇمىت وتىن جاقتى جانە ۇلكەن قيىندىقتاردى جەڭە بىلۋگە ۇيرەتتى» – دەيدى الماتى قالاسىنىڭ اكىمى باۋىرجان بايبەك.
«استانا – ارداعىم» سىيلىعى ءبىلىم مەن عىلىم, ساۋلەت پەن قۇرىلىس, دەنساۋلىق ساقتاۋ, سپورت, ونەر, كينەماتوگرافيا, جۋرناليستيكا جانە ادەبيەت سالالارى بويىنشا بەرىلدى. ۇمىتكەرلەردى ىرىكتەۋ كونكۋرستىق كوميسسيانىڭ سايتىندا اشىق داۋىس بەرۋ ناتيجەسى ارقىلى انىقتالعان بولاتىن.
استانانىڭ عىلىم سالاسىندا دامۋىنا قوسقان ۇلەسى ءۇشىن – ورتالىق مەملەكەتتىك مۋزەيدىڭ ديرەكتورى نۇرسان ءالىمباي, استانانىڭ سپورت سالاسىندا دامۋىنا قوسقان ۇلەسى ءۇشىن - تۋريزم مەن سپورتتىڭ بۇرىنعى ءمينيسترى تەمىرحان دوسمۇحامبەتوۆ, استانانىڭ دەنساۋلىق ساقتاۋ سالاسىندا دامۋىنا قوسقان ۇلەسى ءۇشىن – الماتىداعى №1 پەرزەنتحانانىڭ باس دارىگەرى ناۋرىزباي راقىشەۆ, استانانىڭ ء بىلىم سالاسىندا دامۋىنا قوسقان ۇلەسى ءۇشىن - عالىم, جازۋشى مىرزاتاي جولداسبەكوۆ, استانانىڭ قۇرىلىس سالاسىندا دامۋىنا قوسقان ۇلەسى ءۇشىن - «بازيس-ا» قۇرىلىس كوپوراتسياسىنىڭ باسشىسى الەكساندر بەلوۆيچ پەن ينجەنەر-قۇرىلىسشى وسمان شاحانوۆ, استانانىڭ ساۋلەت سالاسىندا دامۋىنا قوسقان ۇلەسى ءۇشىن – قازاقستاننىڭ ساۋلەتشىلەر وداعىنىڭ پرەزيدەنتى اقمىرزا رۇستەمبەكوۆ, استانانىڭ يننوۆاتسيا سالاسىندا دامۋىنا قوسقان ۇلەسى ءۇشىن - دارىگەر, ينفەكتسيونيست قارلىعاش ابديەۆا,
استانانىڭ ونەر سالاسىندا دامۋىنا قوسقان ۇلەسى ءۇشىن – كوركەمونەر اكادەمياسىنىڭ پرەزيدەنتى اماندوس اقاناەۆ, ءمۇسىنشى بولات دوسجانوۆ جانە ديزاينەر قۇرالاي نۇرقادىلوۆا, استانانىڭ ادەبيەت سالاسىندا دامۋىنا قوسقان ۇلەسى ءۇشىن – جازۋشى جانە جۋرناليست رامازان دۋمان مەن اقىن مارالتاي رايىمبەك, استانانىڭ اقپارات سالاسىندا دامۋىنا قوسقان ۇلەسى ءۇشىن - «ايقىن» گازەتىنىڭ باس رەداكتورى نۇرتورە ءجۇسىپ, فوتوگراف ماكسيم زولوتۋحين جانە 31-ءشى ارنانىڭ باس پروديۋسەرى نۇرجان مۇحامەدجانوۆا, استانانىڭ كينەماتوگرافيا سالاسىندا دامۋىنا قوسقان ۇلەسى ءۇشىن - رەجيسسەر ەرمەك شىنارباەۆ جانە اكتەر ء ادىل احمەتوۆ, استانانىڭ مۋزىكا سالاسىندا دامۋىنا قوسقان ۇلەسى ءۇشىن - كومپوزيتور مارات وماروۆ جانە ء انشى ناعيما ەسقاليەۆالار «استانا-ارداعىم» سىيلىعىمەن ماراپاتتالدى.
كەلەر جىل ەلوردامىز ءۇشىن مەرەيلى جىل. وسىعان وراي الماتىدا استانانىڭ 20 جىلدىعىن مەرەكەلەۋگە ارنالعان بىرقاتار اۋقىمدى مادەني شارالار-كونتسەرتتەر, فەستيۆالدەر, كورمەلەر وتەدى دەپ جوسپارلانۋدا.
ارمان وكتيابر, «ەگەمەن قازاقستان»
الماتى